شاركنا زكرياتك

[حنان]

الحياة كلها زكريات حتى الحاضر بدو يصير زكرى

واحلى شي انو نتصفنلنا شوي بها الزكريات الحلوة او حتى المرة بعد ما نخلص منها

بدنا هون وحتى نعرف بعضنا ونتقارب اكتر نتشارك زكرياتنا مهما كانت مهمة او تافهة

حزينة او سعيدة زكريات اثرت فينا او مرت وخلص

زكريات طفولة وغيرا

تعو شاركونا زكرياتكن

[حنان]

ايام الطفولة


بتزكر منيح لمن كنت صغيرة كان بابا يروح ع المسجد ليصلي الصبح وتئوم ماما تصلي بالئوضة
كنت بنط ع فرشتن الدافية ونام احلى نومة بعمرن ما حاولو يفيئوني..
بس بيوم من الايام وبظن كان يوم جمعة لمن فئت لئيت بابا نايم حدي بسابع نومة
ما بعرف ليش خجلت منو بس من يوميتا بطلت هديك العادة

[r_mido]

أخوي بعد ما نام كان يجيب حبلة ويربطا من رجلي لرجلو مشان بس فيئ اتزكر فيئو معي ع المدرسة
وكل يوم فيئ وانطبش ع خلئتي

[حنان]

أخوي بعد ما نام كان يجيب حبلة ويربطا من رجلي لرجلو مشان بس فيئ اتزكر فيئو معي ع المدرسة
وكل يوم فيئ وانطبش ع خلئتي

ههههههههههههه

[حنان]

خخخخ بلا فضايح خلينا ساكتين

إنشالله بتكون إلي عودة مع أظرف الزكريات
^^

ناطرينك يا حلوة لا تتاخري هه

[حنان]

في مرة انعزمنا على سيران صيف وبحر ومدري شو
فاجتمعت العائلة الكريمة ( بكل الاعضاء الاكارم والفروعات التابعة الها ) عالشط وبلش الحكي باللهجة الوطنية
بعدين انتبهنا على بنتين وائفين كل على حدى عم يطلعو علينا فاختي لكبيرة سالتن خير شو في؟؟ بدكن شي؟؟
وما لائيلكن الا ها البنتين انطلقو متل المجانين ووحدة منن عم تسرخ: ماما ماما عم يمثلو فلم مدبلج (طبعا كان الحكي بلهجتن المحلية)
وما بعرف شو صار فيها بعدين لانو اما سحبتا من ايدا وصارت تحكي معها بطريئة مو مفهومة بس باينتا كانت معصبة

[حنان]

هو مو شط بمعنى الكلمة بس شي عشر امتار صالحين للسباحة والبائي كلو صخور بصخور وغابة وآثار رومانية روعة على مساحة كبيرة ( بعدين لما يتحسن النت عندي بدي جبلكن صور للمنطقة ) فاستئزنا انا وتنتين اخواتي ورحنا تمشينا بالاثار والغابة وطلعنا على مكان كتير عالي كانو جبل صخري تحتو البحر ارتفاعو شي مية متر (على تئديري) بيموت من الخوف وللعلم اختكن حنون عندا رهاب مرتفعات لما اطلعت لتحت حسيت اني بدي زت حالي وصرت صرخ وامسك اخواتي.... بهدلتن المساكين فبعدوني وحرمو يتمشو معي.... بعدين ئعدنا على صخرة مئابيل البحر ئريب من العيلة.... ولفت نظري "فصعون" عم يسبح مع صحابو عجبتني كتير حركاتو وسباحتو الاحترافية.... صار عم يطلع عليي كانو عم يأرجيني انواع السباحة الـ عم يسبحا ويعمل حركات كتير حلوة.. وانتبهو الصبايا الحلوين على نظراتو المو طبيعية ولنظرة الاعجاب الكنت عم اطلع فيها عليه وبلش تلطيش الحكي "السيستري" والتبرير الـمستحيل يقنعن (الحمد الله انو كان ولد صغير والا كانو عملولي ياها ئصة )

[حنان]

ما في حدا بدو يشاركنا زكرياتو؟؟
طيب .... بدي ازعل منكن كلياتكن وما احكي شي ئبل لتحكولنا نهفاتكن المشوقة
هدول هنن الصور الوعدتكن فيون

هون رحنا بهداك اليوم وتمشينا بكل ها المحلات البـ الصور

[r_mido]

بالصف السادس طلعنا رحلة ع غابات برا حلب بالمدرسة
بالرجعة لعبت بعئل رفئاتي انو نعمل مغامرة ونرجع مشي فكرت المسافة ئريبة .. طلعت 30 كيلومتر برا حلب
النتيجة لنص ليل لحتى اجى ابن حلال ع الطريق طالعنا معو ووصلنا + اتلة حشك ولبك من مدير المدرسة ومن ثم بابا ومن ثم كل من طابت نفسه لزالك

[حنان]

[حنان]

بالصف السادس طلعنا رحلة ع غابات برا حلب بالمدرسة
بالرجعة لعبت بعئل رفئاتي انو نعمل مغامرة ونرجع مشي فكرت المسافة ئريبة .. طلعت 30 كيلومتر برا حلب
النتيجة لنص ليل لحتى اجى ابن حلال ع الطريق طالعنا معو ووصلنا + اتلة حشك ولبك من مدير المدرسة ومن ثم بابا ومن ثم كل من طابت نفسه لزالك

ههههههههههه الله يكون بعونك الظاهر كل يلي كانو حواليك بحبو رياضة الضرب
شكرا ع تعاطفك حجي ويا ريت تبسطنا كمان وكمان بمغامراتك الظريفة متل حكايتك يا حلو يا ظريف

[حنان]

ما عم بئدر حط صور تانية يمكن رح عيد حاول مرة تانية

[حنان]

بتزكر بالعطلة الصيفية الماضية عزمتني رفيئتي على حفلة ببيتن وماما ما كان بدها ياني روح لحالي فضليت عم اقنعا ومسحلا جوخ لحتى وافئت وتركتني روح لحالي بدون ما استنى حدا يوصلني
كانت الحفلة حلوة وانبسطنا خير الله.... بس بالرجعة ومتل ما بيعملو بافلام الكرتون كنت سرحانة ومو منتبهة وانا عم ئطع الشارع وبم لئيت حالي طايرة بالهوى وبم تانية وئعت عالطريئ عرفت انو في سيارة حلوة دعستني
اخدني صاحبا عالمشفى وكانت معو عيلتو الكريمة
عملولي اشعة واللزي منو والحمد لله اجت سليمة. عطاني صاحب السيارة موبايلو لاتصل باهلي وطمنن... طارو من راسي كل الارقام وبالزور لتزكرت رقم ماما فاتصللي فيها وصارت المحادثة الاتية:
- الو مرحبا ماما..
-وينك يا منظومة ليش لهلق ما رجعتي وليش عم تتصلي.. من وين عم تتصلي؟؟
-من المشفى ماما
- ليش المشفى شو صاير شو اخدك لهناك..
-ماما طرئتني سيارة
-انو سيارة وين لئيتيها
-بالطريئ ماما
-وانتي شو اخدك ع الطريئ
-كنت بدي ارجع ع البيت
طبعا لما اتزكر حكياتا وهي خايفة بفرط من الضحك بس مسكينة شو رعبتا بهداك اليوم.. بس من هديك الحادثة صرت بنوتة مطيعة بتسمع الكلمة (مشان ما تصير معي حادثة تانية.. مو كل مرة بتسلم الجرة)

[syria oshqy]

زكريات كتيرة
وهي واحدة منها

كانت الكهربا مطفية ببيتي وفقت الصبح انا واختي وزوجي مشان نروح على الشغل
وبقيت ماما وبنت نايمين والتانية راحت على الحضانة ووقت طلعنا من البيت كان في شمعة شاعلة على المغسلة وقت سكرنا باب البيت يمكن اهتزت الشمعة ووقعت وكانت الكارثة
ماما دقتلي على الشغل وقالتلي رجعي هلأ ، البيت صار فيه حريق كنت عم صفت المصاري بدي ارسلها للمصرف رجعتها للصندوق وقلتلو للشوفير بسرعة على البيت قلي مالك زمان جايه قلتلو بسرعة وراح مساعدي معي الطريق من شارع النصر للمليحة مااتحمل 7 دقايق ولما فتت على البيت حمدت ربي كان مكان مالها عاسة الشمعة اربع جرات غاز ملانين ومنظم الكهربا فوق المغسلة محروق طرفه مسكينة ماما كانت بالغرفة مع الصغيرة بدها تفتح الباب تبع الغرفة ما تنفتح معها بعدين شدت الباب قام فتح والضغط المعبي طلع صوت متل الإنفجار وانتشر الشحار بالكردور والمطبخ بترفعي ايدك مابتشوفيها وكل مابتزكر هالحادثة بحمد ربي انو ماانصاب حدا من عيلتي بأذى
ودايما بقول
انو الحسنة الئليلة بتمنع بلاوي كتيرة
هي احدى الزكريات
مشكورة حنان على هالموضوع

[حنان]

الحمد لله ع السلامة تنزكر وما تنعاد....
الشكر الك ع مشاركتك النا بها الزكرى وبتمنى دائما تشاركينا زكرياتك.....
شكرا كتير با غالية