•.★*... إذاعـةُ رَمـضـآنْ الـروزِيـّة ~ r_mido ...*★.•

[ياسمينة الشام]

هــــــآي ~~

اليوم رح يآخدنا بجولة معو بالإذاعة
الآدمن المتأدمن

r_mido



الإستاز المسرحي الكبير صاحب الخبرة الواسعة بالمجال الفني
استمتعو معو , و إذا ما استمتعو معليه اعملو حالكن مستمتعين




بتمنى تابعوا البرنامج الإذاعي معو بهدوء لحتى يخلص
و بس يخلص انهالوا عليه بالتعليقات

اتفضل أحمد شاي المايك معك

______________________________________
تسنيم العثل

[r_mido]

/// البداية ~

هنا إزاعة نيروبي



أعزائي المستمعين أسعد الله أيامكم , تابعونا ع الموجة 99.99 fm


" "

استمتعو معو , و إذا ما استمتعو معليه اعملو حالكن مستمتعين

استمتعو غصب عنكم يعني وحسكم عينكم أشوف حدا مش مستمتع

\
/
\\
/

روئولي بهالغنية لوئت ما ارجعلكم

للسمران مخصوص .. الشئران ما خصون

[r_mido]

/// تجربتي مع مدرسة الحكومة ~



ئبل ماتئرا وتسرد بالموضوع , لازم تعرف انو الصورة اللي فوء لاتمت للموضوع بصلة ووضعت بقصد الإغراء فقط

تجربة المدرسة الحكومية اللي عشتا , " جعل الله لا يعيدا ولا يزكرا بالخير "
دخلت عليها حسيت حالي فايت ع سجن مركزي أو مركز تأهيلي , بعد هالعمر الطويل سجلت بعض الملاحظات عن سنتي الاولى فيها :~

هاد يا سادة يا كرام , كان عنا إمتحان .. والاستاز انفلئ معلائو وهو يئلنا "عجلو عندي نئلة" , طبعاً بعد الاستفسار والتمحيص طلع الأخ عندو ميكرو بينئل فيو كم غنمة مممم ئصدي كم طالب بعشر ليرات ..
استاز وشوفير سوا ..

طيب بحكيلكم عن اول يوم الي بالمدرسة .. بفوت بلائي شمبانزي بهيئة بني آدم متعشبط ع الماسورة تبع المي وبصلح المايكروفون .. فكرتو الحارس , بس مع الأسف طلع المدير ..
مدير وكهربجي سوا ..... وشكلو كان يتابع ماوكلي كتير بصغرو ..

مرة جابولنا استاز جديد , ناطرينو ليشرف بالحصة , وإز بفوت واحد بيرمي جاكيتو ع الكرسي وبيطلع ... لعمش وين راح هاد !! لحئناه لبرا لائيناه نازل خبط بطلاب الصف التامن , وبعدا مارجعنا شفناه ..
استاز وجاكي شان سوا ..

اول ما يرن جرس الصرفة .. مظاهرة ما الها حل الطلاب كلون بئول واحد وهييييييييييييييه ويلااااااااااا , واشي من الباب واشي من الشباب واشي من السور ..
طلاب وقوات خاصة سوا ..

يا ويلو ويا سواد ليلو إذا بيجينا طالب محترم من برا , رح نسخّر احترامنا للشعوب الاخرى من خلالو , فوراً بصير هبيلة الصف وتنمحى شخصيتو وينتهي كيانو ويصير بيشبهنا ..
مدرسة وغرزة سوا ..

وتعو شوفو بالفرصة لما منجتمع ع شباك الحجي لنشتري اكلات , مجزرة نظامي .. ان خطرلك تشتري يا بتوئع نضارتك يا بنسرئو مصاريك يا بتضيع فردة كندرتك وشرطك اذا فتت تجيبا بتضيع الفردة التانية ..
اصلا بلاش تشتري مشان ما تفقد اشيائاتك ..

بالنهاية بوجه تحياتي الحارة لوزارة التربية ع هالوئعة السودا
وشكراً لإهتمامها بتعليم الطلاب الفنون القتالية , وتعيينها اساتزة أصحاب سوابئ


كنا معكم من إزاعة نيروبي اف ام هالحالة

[r_mido]

///بشرى للسوريين ~




عبر أثير إزاعة نيروبي نزف لكم هازه البشرى السارة للسوريين
مبارح سمعت انو اخدنا صك الغفران ورح نفوت كلنا ع الجنة وبدون حساب , رح نفوت لانو نحنا اكتر بلاد الارض جوع وفقر ..
رح نفوتا لانو نحنا اكتر شعب ئرفان , واكتر شعب بيشكي وببكي لحد ما صار من روتين حياتنا ..


مش ئريت ع موقع من هالمواقع انو في شيخ ئال ع السوريين رح يفوتو الجنة كلون بسبب معاناتون اليومية وفقرون وغلا المعيشة ..
طيب انو بمعيتك شفلنا خاطر المغتربين بطريئك بلكي بتلائيلون محل بالجنة ..

رفعت الأقلام وجفت الصحف ... بحسب عمو الشيخ طبعاً .. وطلعو المبشرين بالجنة مش 10 , طلعو 23 مليون + 10 ..
انو دخلك ضمن جولتك المكوكية حول العالم ما مريت ع نيروبي مثلاً , صومال ؟ طيب زيمبابوي ....... لك هدول دول ع حفة الموت
وطلعنا نحنا افئر واجوع بلد بهالكون .... ولك سوريا مش موجودة بقائمة الدول الفقيرة حتى ..

شيوخنا وعلمائنا واقتصاديينا الأفاضل ... بكفي نشر للطاقات السلبية والكآبة لانو مش نائصينكم ..

الله أنعم علينا كتير
بس مشكلتنا شعب ما بيعرف يستغل النعم

[r_mido]

سمعوها هه , انشالله بتطفو الراديو

[r_mido]

/// الجيم ~



هازا الرد محتمل جداً يغيرلك نظرتك للجيم ..

ليش بتروح ع الجيم .. سبيين لا ثالث لهما : " تطوير , أو إصلاح " .

* الإصلاح :~
عند البنات .. لما تبلش تحس حالا شبه البقرة بكل شي .. " كل شي الا العيون " لانو عيون البقرة متعارف عنون انهم حلوين طبعا بئصد كوام الدهن المطبئ فوء بعضو ..
عند الشباب .. ببلش الاصلاح عند الزكر لما يحس بأنو كرشو دخل بالشهر السادس ..

* التطوير :~
عند البنات .. لما تبلش البنت تحس بالغيرة والحسد والاكتئاب والحقد والغضب وانفصام الشخصية لمجرد مقارنتا مع بريتني سبيرز او كارديشان ..
عند الشباب .. نفس الشعور اللي خالج البنت أعلاه لما تبلش حبيبتو تتغزل بجسم براد بيت او توم كروز ..


فيعني بتخلئ من هون فكرة الجيم لانو البنت ما بترضى تكون أئل رشاقة من صبايا المشاهير , وكزالك الشب ما بهون عليه حدا يئول عنو شبه العجل

منجي للمفيد ~
أثبتت دراسة نسيت شو اسما ونسيت مين عملا ونسيت وين صارت , انو 90% من اللي بيشتركو بالجيم بروحو لمرة واحدة فقط ..
ئال لانو البني لآدم ع ئد ما بفكر وببزل مجهود لحد ما يقرر يروح ويدفع الاشتراك , بحس بالسعادو زالرضا وانو هو حقق هدفو وبدون شعور ببطل يرجع مرة تانية ..

وعلى رأي الشاعر اللي نسيان اسمو , ((تبقى البقرة بقرة ,, ويبقى العجل عجلا ))

دخلكم ~
كم مرة اشتركتو بالجيم ومارجعتو رحتو مرة تانية !!؟

[r_mido]

/// النهايات السعيدة ~

النهايات السعيدة.. وهم

النهاية السعيدة هيي آخر صفحة برواية حب قرر فيها الكاتب ما يخبرنا شو صار بعدين
النهاية السعيدة.. هيي اخر مشهد بفيلم رومانس قرر فيه المخرج ما يورجينا قديش الحياة قاسية و ظالمة أحيانا

اما بحياتنا.. النهاية السعيدة الحقيقية (الوحيدة) اللي منعيشا.. هيي لما التنين بيقولو لبعض (بحبك) .. لأول مرة

و بعدا.. ؟

ملطوشة متل ما شفتا بدون تغيير

[r_mido]

تصبحو ع خير , وراجعلكم بكرا

[r_mido]

/// عــدنـــــــــاااآ ~

صباح الخير إيفري بدي

صبحناكم بتحشيشات فيروز

[r_mido]

/// يا ترا لو كنت عربي ~



من فترة ومتل العادة كان مئطوع النت , واللي صار يعتبر ملاز الي وللكتيرين غيري ..
طبعاً فتحولت اهتماماتي للتلفزيون ..
وبإعتباري من متابعي السياسات الامريكية , تابعت على أحد البرامج اعتصام لبعض الأمريكيين ئدام البيت الأبيض .
سأل المزيع واحد من الامريكيين المعتصمين عن رأيو بالحكومة الحالية فكان جوابو التالي :~

” الشعب الأمريكي مل وئرف وئلبت معدتو من عوائل بوش وكلينتون واوباما , وصار لازم نغير “

اللي خوزئني انو الأفندي كان كتير كول وهو عم يئولا , وما التفت حواليه .. لك ولا كأنو وائف ئدام الوايت هاوس ..
فوراً راح مخي لعند عربي عم يئول اخت هالجملة ع التلفزيون ... علي الحلال ما رح يلحئ ينطئ الشهادتين , وياكل صاروخ موجه ذو رأس زكي متل فراء الوالدين مايترك منو الا ما قل ودل ..
وعائلتو الكريمة رح يفتحو فيها سبيل ع طرف الرصيف " واللي بحب النبي يضرب " ..
أما أصدقائو ومعارف ومن خطر ع بالو يتعرف عليه سيتم إعدامهم رمياً بالكنادر أو ضرباً بالشلاليط .

وتاني يوم الصبح رح تسمع الخبر التالي " إلقاء القبض على خلية نائمة تابعة لتنظيم القاعدة وإعدام كل أعضائها " ..

انتبهو تحفظو هالرد بأجهزتكم
وإلا
You will die in 7 days





هازا الرد لاينفي كرهي الشديد لأمريكا
بس يلعن أبو تباً شئد بيفهمو

[r_mido]

/// في أمل ~




دائماً في صديئ واحد ع الائل بمعنى الكلمة بيستحئ منا شوية تفائل ..
في زوجة أو حبيبة نضيفة بالمعنى العام بتستحئ شوية تضحية ..
في حفنة أطفال طيبين بيستحئو شوية أمل ..

يفترض في دائماً شي نعيش مشانو

[r_mido]

/// ابتسموا ~



احكيلكم نكتة بايخة !!؟

بئلكم مجنون شاف ئرد ضايع , أخدو عند الشرطي .. ئلو شفت هالئرد شو أعمل فيه .. حكالو الشرطي خدو ع حديئة الحيوان
تاني يوم رجع هالمجنون عند الشرطي , ئلو مبارح اخدتو ع حديئة الحيوان .. اخدو اليوم ع مدينة الملاهي ؟؟؟


هي ما بتضحك , بس يعني ضحكو شو خسرانين أنا شخصياً ضحكت عليها رغم انها ما بتضحك ..
وبتمنى انو تجاعيد وشكم تكون تحركت عليها

ماعلينا ~ بدي أوصل انو أنا نضافة ئلبك وضميرك بيستحئو الإيتسامة والتعايش مشانون .... أما البائي فـ / طز ..
وعندي ايمان انو الضمير النضيف والانساني بيجعل منك انسان طاهر ..

[r_mido]

/// دير بالك تمرض ~




مرة وأنا وصغير صابني شي ..... شو هو هالشي ما بتزكر
رشح , كريب , ضربة شمس , تسمم ......... اي اي تزكرت يوم انحرئت ايدي .. مش ئلتلكم شي
أخدوني اهلي ع مركز حكومي , وهي المرة الأولى بحياتي اللي بفوتو ... والأخيرة ..

تعليمات حول المراكز الصحية :~

• بالنسبة للدخول , رح تشوف طابور طووووويل .. نصو أحياء .. والنص التاني أموات "ماتو وهنن ناطرين الدور" .. واذا انت حسيت انك رح تموت بالدور اصحك تصرخ وتعيط , موت لحالك احسنلك ..
• جوا رح تلائي جميع مسببات الموت , من اختناق وصدمات عاطفية من المناظر اللي بوشك .. وبس تطلع ماتستغرب اذا دخلت بأنفلونزا وطلعت بجميع أمراض الكون ..
• في حال ئعد جنبك واحد بدون إيد أو بدون راس , كمان ماتستغرب ولاتنسا انك بمركز حكومي ..
• جوا المركز رح تشوف كائن حي بيشبه أبو شفرة , بنظم الدور ع باب الدكتور , هاد بعد عنو ولا تتعاطى معو لانو بشكل خطر ع حياتك ..
• بالنسبة لموضوع الحمام شيلو من بالك نهائي , لانو نضافتو لامحدودة ..
• في حال وصلت عند الدكتور وراح عاطيك ابرة ديتول جاب فيها أجل اللي خلفك , عادي هاد بكون ابوشفرة متنكر دكتور وحابب يخفف دم معك ..
• ئبل ماتفوت ع الدكتور كتوب وصيتك ويفضل تعمل تأمين ع الحياة , سمي بالله .. ونادي فررررررررري دوووووم وطحاش لعندو ... والله يرحمك سلفاً ..

تحياتي القلبية لوزارة الأموات
على اهتمامهم بالطبقة العايفة دينا من الشعب

وشكر مخصوص لابو شفرة كمان

[r_mido]

/// إهدآتي ~ SoOoMa

وهلأ صار وئت الإهداءات
وهي للمتواجدين فقط , مشان ما ينطلي حدا من سنة ما شفت وشو ويحرد



/
\
//
\

SoOoMa


سوما السمسومة , ولك انتي شو بدي احكي عنك مليت من كتر ما حكيت عنك هههه
بنتي العزيزة
مهما كبرتي رح ضل شوفك بنتي
وعقد التبني مازال ساري المفعول
ومازلت أتمنى تجيني بنوتة شبهك بكل شي خلقاً وخلقاً

بس بدك شوي تخففي هبلك وكلو منيح

[r_mido]

/// إهدآتي ~ السندريللا

السندريللا

;


ليش انتي ئليلة عند ربك
هلأ بكتبلك جريدة , بتفوتي حضرتك بتكتبيلي كلمتين تفعيلة منظومات ع البحر الطويل بتسكتي سماي فيون

في حال خطرلك تقيمي او تردي , ارحمي ضعف لغتي يستر عرضك

نسرين
صديقتي العزيزة وشريكتي الروحانية
رح يصرلنا 6 سنين منعرف بعض ومازلتي بالنسبة الي الملاك اليميني المتطرف اللي بينهيني عن اي خطأ
أحياناً غالباً دائماً بشوفك مزعجة لما تفرضي علي افلاطونياتك
بس بيني وبين حالي كزاب , بعرف انو لو مكانتي كبيرة ما بتاخدي هالمواقف تجاهي

رح تبئي ع طول أعز صديقة عندي
بصمتك بحياتك ما بيمحيها موت أو حياة