•.★*... إذاعـةُ رَمـضـآنْ الـروزِيـّة ~ SoOoMa ...*★.•

[ياسمينة الشام]

سؤال للبنات حصراً ...


لو حبيبك اتحول لصرصور
وكان المطلوب انو تبوسيه ليرجع لطبيعته ..
بتبوسيه ولا بتدعسي عليه ؟؟

ههههههههههههههههه

[ياسمينة الشام]

و يوماً ,, سأتزوج رجلاً ,, ما بيعمل لايك لصور هبه نور و بيقول عن مايا دياب شاضومة

[ياسمينة الشام]

[ياسمينة الشام]

بعد فاصل إفطار مطول رجعتلكن

صحة وهنا للكل و تضربوا ليه ما عزمتوني !!

[ياسمينة الشام]

المعايدات الالكترونية ~
اليوم كتار عايدوني
شي 50 ع الفيس بوك و 10 ع الواتس آب و 3 مسنجر وسكايب هههههه
و شي4 اتصلو
المهم ماعلينا
ماحسيت بكل هالنكهة .. ما بعرف ليه
بضل أحلى مكان بحتفل فيه بعيد ميلادي هو الروز
و بكره كل هالتكنولوجيا الجديدة
بتمنى عيد ميلادي يكون هيك لمة لكل الناس يلي بحبهن عندي بالبيت هيك يكونوا كتار و نرقص وننبسط للصبح
مو وحدة بعمرا ما حكت معي زكرها الفيس بعيدي بتقوم بتحطلي Happy Birthday

[ياسمينة الشام]

المناطقية ,,,

شغلة متفشية بهالعالم وين ما رحنا ووين ما جينا
أنا حمصي والحماصني أرجل شي
أنا شامي والشوام أهل النخوة
أنا حلبي وماحدا قدي
أنا حموي والدنيا كلها بتحكي عن رجوليتي
ياريت بتوقف محافظات
من رجع للبلدات الصغيرة يلي جوا
أنو يعني أنا من ريف الشام مو يعني يلي من قلب الشام يجو يتمسخرو علي و كأني أقل منهن كأني بنت العبيد يلي كانوا يشتغلو عند اجدادهن !!
لعمش بئى
والله المناطقية ألعن من الطائفية و العنصرية والمذهبية وكل هالمسخرا
و واحد بايع المبادئ والإنسانية يلي بيتعامل على أساسهن كلهن

[ياسمينة الشام]

يمكن بعض الناس بيدايقوا ليه الروز ممنوع ينحكى فيه بالسياسة
بس صراحةً أنا حاببتو مشان هيك
ولك لأنو قرفت ,, كل مكان بهالدنيا عم يحكو بالسياسة
الصغير يلي ما فئست عنو البيضة صار عندو رأي سياسي و ياخد طرف ويشجع كمان
يعني والله بدها بريك
والروز ,, هو البريك عندي من هالدنيا كلها

[ياسمينة الشام]

حدا مل مني شي ؟؟
استرجوا ملو ههههههه

خدو هالغنية صحصحو عليها شوي

[ياسمينة الشام]

هالغنية دائماً بترفعلي معنوياتي

[ياسمينة الشام]

بعض الناس بيتمسكوا بالفكرة مو لأنها صح ولا لأنهن عنيدين ..
بس لأنهن بيكرهو التغيير .. بخافوا منو ..
بحبو الإستقرار ولو ببركة غباء .. ولا يضطروا ينقلو على عالم العباقرة
لأنو هالشي بالنسبة إلهن صعب ومكلف ( النقلة بقصد )
ورح يخليهن يعيدو دوزنة كل تلافيف مخهن ع الفكرة الصح من أول وجديد
و يغيروا معتقدات آمنوا فيها لسنين ولو كانت غلط
هدول الناس مستحيل يصيروا مستحيل يتطوروا
رح يبقوا بأتعس المراحل الفكرية للكائن المسمى ( إنسان )

[ياسمينة الشام]

بدي صير دكتور/ة
من نحنا وصغار و كل الصف بدو يطلع دكتور .. ليش ما بيعرفو !!
لأنو أهلهن حكولهن الدكتور أحسن شي وأي شي تاني هو كخ ويع و دون
و بينحتو هالطلاب بالدراسة و بجيبوا هالمجموع و بفوتوا هالفرع
جزء منهن بسيط جداً بينجح وبيطلع دكتور ناجح
جزء منهن بينجح وبيطلع دكتور كرهان هالمهنة و أبو اللي امتهنها
جزء كبير بغير الفرع قبل ما يخلصه دراسه
بنرجع للأساس ..
هنن ما فاتو هالفرع لأنو هنن بدهن
هنن فاتو هالفرع لأنو اهلهن بدهن .. و قد ما حاولو يقنعوا حالهن أنو مو مشان هيك فهنن كزابين
هنن حققوا حلم أهلهن مو حلمهن .. مشان أهلهن يتباهوا أنو ابنهن أو بنتهن دكتور/ة ..
و بينسوا أنو لتكون دكتور و طبيب المفروض تكون صاحب قلب طيب ورحيم وبتحب تساعد الناس .. إنسان عندو قدرة على العطاء والالتزام
و بفكرو أنو أي حدا بيقدر يمتهن هالمهنة بمجرد أنو جمع معدل عن طريقة النسخ بمخو واللصق ع الورقة

[ياسمينة الشام]

مبارح حطو هي الغنية لحتى يرئصوا عليها الولاد
يخرب بيتهن صرت بس بدي ارقص معهن لو ما كان في كاميرات وتصوير بس
و كل ما إجي أعمل حركة غبية أتخيل عماتي فتحو التلفزيون وشافوني وبلشو يحكو علي ههههههه
يلعن تباً
من هالمنبر بقول وبكل فخر .. الأقارب عقارب
و هل كلكن شغلو هالغنية و ارقصو عليها لتشبعو

[ياسمينة الشام]

و هيك بعلن ختام التغطية الإذاعية معي
أي حدا عندو تعليق يتفضل يئولوا
يشترط تعليقات المدح وتمسيح الجوخ فقط
و أي تعليق خارج هذه الأمور سيتم حزفه

[r_mido]

اي شو هالحلى , ولا شام اف ام بعزا
بتشبه تلفزيون الواقع ههههههه صرعتي راسنا


حبيت تجربتك مبارح وحبيت كيف عشتيها , وهي لما كنت ئلك بجيكي فرص تظهري فيها شخصيتك صار وانتي بهالعمر
طبعا لسا ئدامك اشيا كتير تظهري فيها وتطالعي امكانياتك الي حضرتك ما شايفتيها

ابدعتي سمسم وكنت استنى كل رد منك مشان شوفو وحابب ارد ع كل رد كتبتي بس بصير الموضوع شوربة بعدين هههههه

[ياسمينة الشام]

اي شو هالحلى , ولا شام اف ام بعزا
بتشبه تلفزيون الواقع ههههههه صرعتي راسنا


حبيت تجربتك مبارح وحبيت كيف عشتيها , وهي لما كنت ئلك بجيكي فرص تظهري فيها شخصيتك صار وانتي بهالعمر
طبعا لسا ئدامك اشيا كتير تظهري فيها وتطالعي امكانياتك الي حضرتك ما شايفتيها

ابدعتي سمسم وكنت استنى كل رد منك مشان شوفو وحابب ارد ع كل رد كتبتي بس بصير الموضوع شوربة بعدين هههههه

أهلا وسهلا ومية مرحبا
آنست وشرفت أبو الميد
شكراً لثقتك فيي , هالشي كتير بيعنيلي
وعادي رد ئد ما بدك روحنا الشوربة
و مبسوطة كتير أنو عجبتك الإذاعة معي ..