الفيس بوك سخف و دمر كل ما هو جميل في الحياة ... هل توافق ؟

[وتزهر الامال]

عملي مقارنة بين رواد الفيس بوك العرب والأجانب , الصفحات العربية والصفحات الأجنبية ..... رح تلائي العلّة كالعادة هي بالعرب ...
العرب سبحان الله عندهم القدرة انو يجعلو من أي أمر شي تافه ...

هنا اساس المشكلة نحن لانستخدم كل ماياتي الينا بطريقة صحيحة وايجابية الفيس بوك كان لدى الغرب والاخرين لتواصل بين الاقارب البعيدان والمغتربين ولبعض الامور التجارية والفائدة العامة ونحن عندما اتى الينا نعلم جميعا كيف استخدم الا القليل ممن رحم ربي
اللهم احفظنا بما تحفظ عبادك الصالحين
اللهم احفظنا بحفظك

[Rainbow]

انا برأيي انه الفيس بوك الو ايجابياته والو سلبياته ,,,,, بس هادا الشي كله بعتمد عالشخص نفسه كيف يستخدمه

هوي نفس الكلام أختي عم نسمعه ، بس المشكلة انو في شي غلط ،، و الحمد لله عم نحاول نوضح و نوصل لحل مريح و مرضي

أسعدني مرورك أخية

[Rainbow]

بعد كل هذا السرد ... هل توافقني ؟ ام تنتقد ما جئت به

ما هو رأيك ؟
____________________________

لآ أنتقد ولا أضيف على ما قلتي ابدا"
وانا موافق على طرحكم بكل التفاصيل وادعمه اليوم وغدا
وكل يوم ..

مع جزيل الشكر والتقدير

شكراً أخي ، يمكن انت اول واحد يوافقني تماماً

و ان شاء نوصل لحل يوافق عليه الاغلبية

[Rainbow]

ممم كلامك صح , يمكن انا اشتركت بالفيس ب 2008 او 09 مابزكر بس كان محجوب بسوريا وما حدا بيعرفو , كان متلو متل كتير مواقع على نفس المبدأ مارح ئلك كان منيح او عاطل
بس فيني ئلك كل شي بكون تحت السيطرة ما منو خوف ,
الفيس بوك هو عبارة عن موقع لا اكتر ولا ائل , موقع انتي المتحكمة فيو وانتي المسيطرة ع كل شي فيو ابتداء من الاصدقاء للمنشورات للمسجات للمعارف
ان كان بدك رأيي , فرأيي هو انو انتي محملة الموضوع اكبر من حجمو .. فيكي ببساطة تعملي قوقعة لحسابك مايكون فيها غير الناس اللي بتثقي فيون وماتتعاطي الا مع الشي اللي بفيدك
ومشان موضوع سوريا والثورات فمارح احكي فيو هون لانو بالمنتدى ما منحبذ هالاحاديث ..

الخطوة الي لح اعملا هي اني لح افتحو و جرب القوانين الصارمة اللي حكيت عنها

و بالحقيقة هي قوانين لا تمت بأعرافنا و تقاليدنا اللي تعودنا فيها عالكرم و الطيبة و الأخلاق الرفيعة بس الموقع اجنبي و الناس عبدة فيه و لأنهم اختاروا هيك موقع ليترددوا عليه و يقبلوا بالوساخة و الرياء اللي فيه لازم يقبلوا القوانين الصارمة اللي لح نحطا و هي مافي رحمة اللي بدو يزعجنا حذف فوري من دون لا انذارات و لا حركات ولا وجع قلب

و بالنسبة لاشتراكي فيه كان ب 2005 اول مرة و كان ما معروف بنووووب متلو متل هاي فايف و حتى هاي فايف كان مشهور وقتا اكترمنو ... طبعاً اذا حدا بيذكروه

المهم حنجرب هالطريقة و شوف بتمشي و برتاح و بحس انها زابطة ... انطلاق

[Rainbow]

هنا اساس المشكلة نحن لانستخدم كل ماياتي الينا بطريقة صحيحة وايجابية الفيس بوك كان لدى الغرب والاخرين لتواصل بين الاقارب البعيدان والمغتربين ولبعض الامور التجارية والفائدة العامة ونحن عندما اتى الينا نعلم جميعا كيف استخدم الا القليل ممن رحم ربي
اللهم احفظنا بما تحفظ عبادك الصالحين
اللهم احفظنا بحفظك

اختي الكريمة كون بسوريا ما بفكر افتحو و الغربة هي اللي جبرتنا نتردد عليه كتير حتى نتواصل مع اقاربنا و معارفنا و نشوف شو صاير معن

بس خلانا او بلاحرى الغربة خلتنا نخ الو و الا بسوريا كنت زابلتو زبلة الكلاب و ما بشتريه بنص ليرة

و هوي اكيد طريقة استخدام الناس المنفتحة ما متل طريقة الناس الجاي من ورا البقر و متمدنة جديد ،،، أكيد بتفرق

أسعدني مرورك

[Randah]

يعني ما بعرف ليش هيك اخدين موقف سيئ من الفيس بوك ,,
بصراحة انا بشارك ميدو بالرأي ,, كلامو منطقي جدا ,,

الف شكر

[نور روز]

كل المجالات بالحياة مفتوحة قدامنا ..تحت لازم نعرف كيف نستخدمها ونحافظ على خصوصية يلي النا ..شكرا موضوع حلو كتير

[Rainbow]

يعني ما بعرف ليش هيك اخدين موقف سيئ من الفيس بوك ,,
بصراحة انا بشارك ميدو بالرأي ,, كلامو منطقي جدا ,,

الف شكر

لأن عم يصير فيه مشاكل و حزازات و هوي سبب كبير باللي عم يصير ببلادنا و تدور حوله شبهات و الله اعلم

و عالعموم الله يلهمنا الخير اتجاه استخدام هالموقع

شكراً لتعقيبك أخية

[Rainbow]

كل المجالات بالحياة مفتوحة قدامنا ..تحت لازم نعرف كيف نستخدمها ونحافظ على خصوصية يلي النا ..شكرا موضوع حلو كتير

مزبوط اختي نور الله ينور و يفتح علينا

أسعدني مرورك

[Rainbow]

انتهيت الى انو مستحيل التعامل معه خصوصي من ناحي ، وانو موقع عقيم الفائدة الطيبالمرجوة و الله اعلم

تعبت لابععععدددد حددد خلص

Game Over

[ياسمينة الشام]

الفيس بوك وسيلة اتصال عبر الانترنت .. متلو متل كل الوسائل
و الضرب عالشخص يلي بيستخدمو هو بيقدر يستخدمو على كيفو وعلى هواه
ونفس الاشخاص ع الفيس منتشرين بكل مواقع الانترنت
يعني اذا الفيس سيئ فكل النت سيئ
و كلو سلاح ذو حدين فيو خير وفيو شر

[Chris]

الفيسبوك متلو متل الحارة بالحياة الطبيعية
فيها كلشي بيخطر على بال الانسان من الشخص المثقف المتوازن صاحبة المكانة الاجتماعية لصاحب بسطة دخان وبياع جرابات

والله لو كل واحد بيلتزم مكانه بالفيسبوك ومابينظر على البائي ومابيتفلسف عالكل بيكون مافي منو
بس مثلا بتشوف صفحة او شخص افكارو خاصة فيه وبتعبر عنو الزلمة مالو ملتزم اجتماعيا او دينيا , بتلائي مدري من وين بيطلعلو واحد مصر انو ينصحه ويهديه للطريق القويم
وفكرة انو كل العالم بتحط ادعية وكل العالم بتحط اذكار وبتحكي مع بعض برياء وتكلف والله مو حلو , يعني مو شرط تورجي الدنية انك حجي وشيخ وداعية اسلامي ومفكر

وفي نموذج هاد بيخلي الدم يغلي براسي بيكون هو : شاعر , وناقد سينمائي , ومصور فوتوغرافي , موسيقي لايشق له غبار , اخصائي اجتماعي , اخصائي نفسي , فيزيائي نووي , محلل سياسي , قارء للواقع العربي , مقارن للحقبات التاريخية , قارء للادب العالمي , متطلع على الفكر العلماني ومنظر لاديني وفوء كل هاد شيخ ومفتي
طيب وبعدين؟؟؟ هاد شي طبيعي؟؟؟

كل شخص يلتزم بالي الو ويلي عليه وخلص ماحدى الو عند التاني , بس للاسف كلو بدو يتدخل وينظر ويورجي حالو هو الفهمان , في كتير ناس بتكون مشاركة بصفحات مناقضة لمحتواها وبتلائي فعال بالتنين مثال واحد مشترك بصفحة اخلاق الشاب المسلم وبنفس الوئت مشارك بصفحة احلى بنات على شط البحر ... خير نشالله وبعدين؟

ومرات بتلائي واحد حاطط ستيتس عم يحكي فكرة وفي مين عم يتناقش معه ومنسجم معو تماما بتلائي تعليق من واحد اسمو ابو فلان (ِشو يا افندي صاير بتعرف تحكي مابك شي والله ) او بتلائي واحد كاتبلو (يازلمة عم اتصل فيك ليش مسكر موبايلك) او بتلائي وحدة عمرها تسعمية سنة عم تئلو على نفس الكومنتات (حبيبي خلي ماما تحكي معي اشتقتلكن)
ايييييييييييييييييييييي طيب بالله العظيم هاد شو؟؟؟ مو فوضى وسوء استخدام وضراب الصخن ؟؟؟ و بدكن العالم ما تضحك علينا

متل العديم يلي وئع بسلة تين وبدو يشوف كلشي بالدنية ويشارك بكلشي بالدنية ويحكي عن كلشي وهو العالم العارف بكلشي حوليه .. طيب هاد لحالو سبب يخليك تكره الفيسبوك وماتشوف منو ايا شي ايجابي

الخلاصة الفيسبوك موقع مفيد في حال استخدم بشكل صحيح (يعني مو للشعب العربي) نحنا عرب تووك وكتير علينا لك نص محتوى الانترنت العربي بالنص صور بنات بالزلوطة ومسبات رزيلة وفيديوهات طبعا عم تشرح وتحكي عن فضايح مابعرف مين

لك عيب عيب والله عيب

هالشعب عندو القدرة انو يحول كلشي ايجابي لمزبلة من الدرجة التسعمية

شكرا عالموضوع يلي خلاني فش البي

[تَـرَفْ ~]

المشكلة مو بالفيس بوك , المشكلة بالشخص يلي بيستخدموه
ويبدو إنك ما عرفتي تستخدميه بطريقة تفيدك !!

[عاشقة سوريا]

أنا بصراحة ما عندي فيس بوك وماني ناوية أفتح واحد بس بعتقد أنو بين بين يعني على حسب ألي بيستعملو...